عندما تصفو السماء

استقظت على مكالمه منه واصراره ان اجيب .نظرت الى الرقم فى ثقل منى للرد لما اعانيه من ملل وعدم الرغبه لاسمع شكوى من احد فاذا به يصرخ بى فى فرحه لم استشعرها من صوته من قبل ليدور هذا الحوار
انا : ازيك
هو : انتى لسه نايمه قومى اشهدى اللحظه التاريخيه انا استجمعت قوايا وهعملها
انا : هتعمل ايه اوعى تكون ناوى تريحنى منك
هو : لا مش دلوقتى انا بتكلم جد هروحلها والى يحصل يحصل وهقولها وخلاص انا تعبت
انا: اخيرا هتعملها بس قولى نوعها الله يخليك
هو : هى ايه
انا : حبوب الشجاعه الى انت واخده على الصبح ومصحينى من عز النوم عشان تبلغنى الخبر
هو : كنت فكرك هتفرحى
انا : المهم هى تفرح وتوافق
هو : تفتكرى رد فعلها هيكون ايه
انا : لو منها هنشف ريقك زى منت عملت فيها على ما نطقت
هو : عشان بحبها بجد ومكنتش عايز ابهدلها معايا ولانى عايزها بجد
انا : كان نفسى افرح من زمان يا ساتر اخيرا
هو : انا هكلمها وابقى اقولك الاخبار
انا : ماش بس الله يكرمك استمر وبلاش تتراجع وتهته
هو : هو انتى دايما بتحدفى طوب كده الهى افرح فيكى قريب
انا: معتقدش
هو : مش طالبه كابه دلوقتى روحى كلميها وقوليلها انى عايز اتقدم
انا : ايه رايك واروح اطلب اديها من ابوها كمان بالمره واعلى الجواب
هو : يصمت ولا يرد
انا: لحد امتى هتتردد دى اللحظه الى لازم تاخد فيها خطوه
هو : خايف
انا: انت عارف انها بتحبك وعيزاك
هو : هكلمها وامرى لله

وقفلت الخط وداخلى شئ من السعاده اريد ان ارقص اغنى اصرخ بصوت عالى اخيرا سيفرح قلبان اخيرا سيدق الفرح بابهما اخيرا بعد انتظار عامان وكلاهما اقسما على الا افشى سرهما لكلاهما. جميله الحياه عندما تصفو السماء حقا .جريت الى مراتى انظر الى كانى انا العروس وفى انتظار سماع تلك الكلمه ولكنى سرعان ماعدت لوجومى ورددت كلمتى التى كثيرا ما ارددها بعد المطر تصفو السماء